Главная » 2016 » Январь » 14

Зоҳиршох Жўраев отаси билан бир саҳнада куйлади


  • Admin
  • 15 Янв 2016(00:04)
  • 829
  • 0

14 январь куни хонанда Зоҳиршох Жўраев узоқ танаффусдан сўнг куйлаган “Мама” номли қўшиғига ишланган видеоклипининг тақдимот маросимини ўтказди.

 

Дунёда онадек улуғ, мўтабар, меҳри беўлчов зот бўлмаса керак. Она, Мама, Мамо, Анне, Мутти, Mother... Бу сўз қайси тилда жаранг сочмасин, ўшандоқ чиройли, ўшандоқ қадрли. Юрагимизнинг қат-қатида беркиниб ётган энг гўзал туйғуларимиз, энг ширин хотираларимиз она сути ила жонимизга жо бўлган. Унинг алласи дуёни танитди, қалбимизга зиё таратди. У – меҳрнинг боғбони. Бешигимизнинг тебратган қўлларнинг тафтидан куч олганмиз, қароқларидаги нурдан дунё гўзаллиги англаганмиз.



14 январь куни хонанда Зоҳиршох Жўраев узоқ танаффусдан сўнг куйлаган “Мама” номли қўшиғига ишланган видеоклипининг тақдимот маросимини ўтказди. Тақдимотга ўзбек эстрадаси ва кино оламининг кўзга кўринган вакиллари – Ўзбекистон халқ артистлари Лутфулла Саъдуллаев, Мирза Азизов, Ўзбекистонда хизмат кўрсатган артистлар Элмурод Исломов, Гулчеҳра Саъдуллаева, Мавлуда Асалхўжаева, Тожибар Азизова, Ҳосила Раҳимова, хонандалар Манзура, Ирода Дилроз, Муниса Ризаева, Амира Алибекова, Ягона, “Уммон” гуруҳи, актрисалар Зуҳра Солиева, Дилноза Кубаева, Шаҳзода Муҳаммедова, Муқаддас Саъдуллаева ташриф буюришди. Кечани истеъдодли сухандон Нилуфар Сотиболдиева олиб борди.



Саҳнага таклиф қилинган Зоҳиршох Жўраев қўшиқлар гулдастасини “Ягонамсан”дан бошлади. Жонли мусиқа, жонли ижродаги кичик концерт дастури давомида хонанданинг “Мама” номли қўшиғига ишланган видеоклип катта мониторда намойиш этилди. Клип намойишига қадар Зоҳиршох қўшиқ тарихига тўхталиб ўтди. “Бу қўшиқни бундан 30 йил аввал дадам куйлаган эдилар. Доғистон халқ шоири Расул Ҳамзатовнинг шеъри асосида айтилган бу қўшиқни отам каби куйлай олмадим деб ўйламайман”, – дейди хонанда.

Бир сўз билан айтганда, қўшиқ йиғилган барча меҳмонларга бирдек манзур бўлди. Клипмейкер Дилмурод Агзамов томонидан суратга олинган клип эса уни томоша қилган кишининг юракларини ларзага келтириши турган гап. Клипда она тимсолида тинчликнинг олий неъмат экани тасвирланган.



Сўнгги йиллардаги ижодий танаффус Зоҳиршох Жўраевга анча қўл келган кўринади. Унинг ижоди ана энди айни қийғос гуллаган дарахт сингари гуркирабди. Овоз имкониятлари сезиларли даражада ортибди. Хонанда нафақат ўз қўшиқларини, балки, отаси Шерали Жўраевнинг қўшиқларини ҳам маҳорат билан куйлаб, устазода санъаткор номига лойиқ эканини томошабинлар қаршисида исботлади. Шундан сўнг саҳнага Ўзбекистон халқ артисти Шерали Жўраев таклиф этилди. Устоз санъаткорни йиғилган меҳмонлар тик турганча, қарсаклар билан кутиб олишди. Шерали Жўраев кенжа ўғли Зоҳиршох “Мама”ни ўзидан ҳам яхшироқ куйлаганини айтиб, унга омад тилади.





Йиғилганлар ундан қўшиқ куйлаб беришини сўрашгач, Шерали Жўраев меҳмонларнинг илтимосларини ерда қолдирмай “Дунёга тинчлик беринг” ва “Ўзбегим” номли узоқ тарихга эга бўлган қўшиқларини куйлаб берди.



Шу ўринда “Дунёга тинчлик беринг” қўшиғига тўхталсак: Йиллар ўтса-да Шерали Жўраевнинг ушбу қўшиғи ўз кучи ва долзарблигини йўқотмай келяпти. Тақдимотга йиғилганлар бунга яна бир бор амин бўлган бўлса ажабмас. “Дунёга тинчлик беринг”. Бу қўшиқда тинчликсевар халқимизнинг азалий қадриятлари, юрагидаги гаплари ўз ифодасини топгандек. Қўшиқни тинглай туриб дунёнинг турли бурчакларида бўлаётган қирғинбаротлар, урушлар, фарзандидан ажраган оналар доди, ўқ товушидан зир титраган фалакнинг авзойи, хуллас ҳамма ҳаммаси кўз ўнгингиздан худди кино лентасидек ўтади.

Зоҳиршох отасининг ҳам, йиғилган меҳмонларнинг ҳам ишончини оқлади. Уни қутлаб сўзга чиққан эстрада ва кино оламининг таниқли вакиллари “Мама” қўшиғи ҳақида чиройли фикрлар билдиришди. Кўрамиз, халқ хонанданинг янги қўшиғини ва клипини қандай кутиб олади?













Дарвоқе, Зоҳиршох саҳнада турса ҳам “юлдуз”ликка даъво қилмаяпти. Унда томошабинлар қаторида ўтирган эстрадамиз “юлдуз”лари каби манманликни, ҳаволаниб осмонга сакрашни сезмадик. Жонли ижрода айтиш уёқда турсин, эплаб қўшиқ айта олмаётган хонандалар бугунги тақдимотдан тўғри хулоса чиқаришса мақсадга мувофиқ бўларди. 
 
 
manba:qalampir.uz
Всего комментариев: 0
avatar